ປາຖະກະຖາວັນຜ່າວົງປິດລ້ອມຂອງກອງພັນທີ່ 2 ວິລະຊົນ ແລະ ວັນວິລະກໍຳແຫກຄຸກຢ່າງມະຫັດສະຈັນ.

ສ້າງຂື້ນເມື່ອ ວັນຈັນ, 23 ທັນວາ 2019 04:08
ຂຽນໂດຍ ຄອຂ ຄຳມ່ວນ

ປາຖະກະຖາວັນຜ່າວົງປິດລ້ອມຂອງກອງພັນທີ່ 2 ວິລະຊົນ ແລະ ວັນວິລະກໍຳແຫກຄຸກຢ່າງມະຫັດສະຈັນ.
 ໃນວັນທີ່ 17 ພຶດສະພາ 2019 ຄະນະໂຄສະນາອົບຮົມແຂວງຈັດປາຖະກະຖາລະນຶກວັນຜ່າວົງປິດລ້ອມຂອງກອງພັນທີ່ 2 ວິລະຊົນ ຄົບຮອບ 60 ປີ (18/5/1959-18/5/2019) ແລະ ວັນວິລະກຳແຫກຄຸກຢ່າງມະຫັດສະຈັນຂອງຜູ້ນຳແນວລາວຮັກຊາດ ຄົບຮອບ 59 ປີ (24/5/1960-24/5/2019).

ທີ່ສະໂມສອນໃຫຍ່ແຂວງຄຳມ່ວນ. ໂດຍການໃຫ້ກຽດຂຶ້ນປາຖະກະຖາຂອງ ທ່ານ ສຸກສະຫວາດ ລັດຖະຈັກ ຄະນະປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ. ມີບັນດາຫົວໜ້າພະແນກ, ຮອງຫົວໜ້າພະແນກ, ນາຍທະຫານ, ນາຍຕຳຫຼວດ, ຕະຫຼອດຮອດພະນັກງານຫຼັກແຫຼ່ງ ແລະ ນັກສຶກສາ ເຂົ້າຮ່ວມທັງໝົດ 597 ຄົນ, ຍິງ 246 ຄົນ. ໃນພິທີທ່ານຍັງໄດ້ຍົກໃຫ້ເຫັນເຖິງຄວາມໝາຍຄວາມສຳຄັນຂອງການຜ່າວົງປິດລ້ອມຂອງກອງພັນທີ່ 2 ໄດ້ສ່ອງແສງໃຫ້ເຫັນວ່າການນຳພາຂອງພັກຖືກຕ້ອງສະຫຼາດສ່ອງໃສ, ຂະບວນການຕໍ່ສູ້ຂອງພວກເຮົາແມ່ນເປັນທຳ. ສະນັ້ນການຜ່າວົງປິດລ້ອມຂອງກອງພັນທີ່ 2 ໄດ້ຢັ້ງຢືນໃຫ້ເຫັນຢ່າງຈະແຈ້ງວ່າ: ສິນທຳຍາມໃດກໍ່ຊະນະອະທຳ, ແມ່ນໄຊຊະນະອັນໃຫຍ່ຫຼວງຂອງກຳລັງປະກອບອາວຸດທີ່ຢູ່ພາຍໃຕ້ການນຳພາຂອງພັກ, ເປັນເຫດການປະຫວັດສາດອັນສຳຄັນຂອງຊາດ, ຂອງພັກ, ຂອງກອງທັບ ແລະ ເປັນບົດຮຽນອັນລ້ຳຄ່າທີ່ສຸດໃຫ້ແກ່ຂະບວນການຕໍ່ສູ້ຂອງກອງທັບ ແລະ ປະຊາຊົນລາວຍາດເອົາໄຊຊະນະໃນໄລຍະຕໍ່ມາ. ຈາກນັ້ນທ່ານຍັງໄດ້ເລົ່າເຖິງວິລະກຳໂຕນຄຸກຢ່າງມະຫັດສະຈັນຂອງບັນດາຜູ້ນຳຂອງພັກໄປສູ່ເຂດທີ່ໝັ້ນຢ່າງປອດໄພຍ້ອນການນຳພາອັນສະຫຼາດສ່ອງໃສຂອງປະທານ ໄກສອນ ພົມວິຫານ ແລະ ສູນກາງພັກ, ການຊີ້ນຳລະອຽດຂອງທ່ານ ສາລີ ວົງຄຳຊາວ, ຄະນະພັກແຂວງ ທີ່ມີນ້ຳໃຈຮັກຊາດ ອັນແຮງກ້າຂອງບັນດາຜູ້ນຳເຮົາທີ່ມີຄວາມກ້າຫານ, ຕັດສິນໃຈຕໍ່ສູ້ຍອມເສຍສະຫຼະມີຄວາມປີຊາສາມາດຂົນຂວາຍ, ສຶກສາອົບຮົມສາລະວັດທະຫານ, ເຮັດໃຫ້ສັດຕູກາຍເປັນມິດສະຫາຍຮ່ວມຕາຍນຳກັນໄດ້.
 ໃນຕອນທ້າຍ ທ່ານ ສຸກສະຫວາດ ລັດຖະຈັກ ໄດ້ຮຽກຮ້ອງໃຫ້ພະນັກງານ, ສະມາຊິກພັກ ຈົ່ງຕັ້ງໜ້າຮ່ຳຮຽນເອົາມູນເຊື້ອອັນພິລະອາດຫານ ແລະ ອອກແຮງເສີມຂະຫຍາຍມູນເຊື້ອອັນສະຫງ່າງາມຢ່າງບໍ່ຢຸດຢັ້ງ.