ກອງປະຊຸມພົບປະລະຫວ່າງແຂວງຄຳມ່ວນ ແລະ ກວາງບິ່ງ.

ສ້າງຂື້ນເມື່ອ ວັນພະຫັດ, 02 ມີຖຸນາ 2022 07:39
ຂຽນໂດຍ ຄອຂ ຄຳມ່ວນ

     ໃນວັນທີ 24-26 ພຶດສະພາ 2022 ຄະນະໂຄສະນາອົບຮົມແຂວງຄຳມ່ວນ  ຮັບຕ້ອນການມາຢ້ຽມຢາມ ແລະ ເຮັດວຽກຢູ່ແຂວງຄຳມ່ວນຂອງຄະນະໂຄສະນາສຶກສາພັກ ແຂວງກວາງບິ່ງ.

ກອງປະຊຸມພົບປະ ແລະ ເຊັນບົດບັນທຶກຊ່ວຍຈຳ ລະຫວ່າງຄະນະໂຄສະນາອົບຮົມແຂວງຄຳມ່ວນ ສປປ ລາວ ແລະ ຄະນະໂຄສະນາສຶກສາພັກ ແຂວງ ກວາງບິ່ງ ສສ ຫວຽດນາມ ໄດ້ໄຂຂຶ້ນທີ່ຫ້ອງປະຊຸມເຮືອນພັກເບີ 1 ໂດຍການເປັນປະທານຂອງສະຫາຍ ສົມພົງ ວັນໄພທອງ, ຄະນະກຳມະການປະຈຳພັກແຂວງ, ຫົວໜ້າຄະນະໂຄສະນາອົບຮົບແຂວງ ແລະ ເຂົ້າຮ່ວມຂອງສະຫາຍ ກາວ ວັນດິ່ງ, ກຳມະການປະຈຳພັກແຂວງ, ຫົວໜ້າຄະນະໂຄສະນາສຶກສາພັກ ແຂວງກວາງບິ່ງ, ພ້ອມຄະນະ, ໂດຍປະຕິບັດຕາມເນື້ອໃນບົດບັນທຶກການຮ່ວມມືຄັ້ງວັນທີ່ 6 ຕຸລາ 2017 ກອງປະຊຸມດັ່ງກ່າວທັງສອງແຂວງກໍໄດ້ລາຍງານແຈ້ງສະພາບລວມຂອງແຂວງ ແລະ ການເຄື່ອນໄຫວວຽກງານຂອງອົງການຕົນໃນໄລຍະຜ່ານມາໂດຍສັງເຂບ ແລະ ພ້ອມກັນຄົ້ນຄວ້າປຶກສາຫາລື, ແລກປ່ຽນບົດຮຽນເຊິ່ງກັນ ແລະ ກັນ; ຜ່ານການແລກປ່ຽນ ທັງສອງຝ່າຍພ້ອມກັນລົງນາມໃນບົດບັນທຶກການຮ່ວມມື ແລະ ເອກະພາບກັນສືບຕໍ່ປະສານສົມທົບວຽກງານໂຄສະນາ ກ່ຽວກັບການພົວພັນສາມັກຄີແບບພິເສດ, ມູນເຊື້ອຂອງສອງພັກສອງລັດສະເພາະ ກໍຄືສອງຄະນະໂຄສະນາອົບຮົມແຂວງຄຳມ່ວນ ແລະ ຄະນະໂຄສະນາສຶກສາພັກ ແຂວງກວາງບິ່ງ, ສືບຕໍ່ແລກປ່ຽນຂໍ້ມູນຂ່າວສານຢ່າງເປັນປົກກະຕິ, ແລກປ່ຽນບົດຮຽນການຈັດຕັ້ງ, ຊີ້ນຳ, ຄຸ້ມຄອງ ແລະ ບັນດາການເຄື່ອນໄຫວໃນຂົງເຂດວຽກງານທັງສອງແຂວງ, ສອງຝ່າຍຮ່ວມມືກັນຄົ້ນຄວ້າ ປະສານສົມທົບເພື່ອຈັດຕັ້ງການເຄື່ອນໄຫວທັດສະນະສຶກສາ, ຮ່ຳຮຽນເຊິ່ງກັນ ແລະ ກັນເມື່ອມີເງື່ອນໄຂ, ສືບຕໍ່ຈັດຕັ້ງບັນດາການເຄື່ອນໄຫວພົບປະ, ແລກປ່ຽນວັດທະນາທຳ, ບົດຮຽນໃນການເຮັດວຽກລະຫວ່າງສອງແຂວງ, ດ້ວຍຮູບການຜັດປ່ຽນກັນເປັນເຈົ້າພາບ 2 ປີຕໍ່ 1ຄັ້ງ, ເພື່ອເປັນການຮັດແໜ້ນຄວາມສາມັກຄີແບບພິເສດຂອງສອງພັກສອງຊາດລາວ-ຫວຽດນາມ ແລະ ເປັນການສ້າງຂະບວນການຕ້ອນຮັບສອງວັນປະຫວັດສາດສອງຊາດລາວຫວຽດນາມ ກໍຄືວັນເຊັນສົນທິສັນຍາ ການພົວພັນຮ່ວມມືມິດຕະພາບລາວ-ຫວຽດນາມ ຄົບຮອບ 45 ປີ (18/7/1977-18/7/2022), ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 60 ປີ (5/9/1962-5/9/2022).