ສະຫຼຸບການຈັດຕັ້ງປະຕິບັດວຽກງານຂະບວນການແຂ່ງຂັນ-ຍ້ອງຍໍ ພາຍໃຕ້ຄຳຂວັນ “ຮັກຊາດ ແລະ ພັດທະນາ” ແລະ ມອບຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2022.

ລາຍລະອຽດ

ສ້າງຂື້ນເມື່ອ ວັນຈັນ, 22 ພຶດສະພາ 2023 08:57

ຂຽນໂດຍ ຄອຂ ຄຳມ່ວນ

     ວັນທີ່ 22 ພຶດສະພາ 2023 ຄະນະໂຄສະນາອົບຮົມແຂວງຄໍາມ່ວນຈັດພິທີສະຫຼຸບການຈັດຕັ້ງປະຕິບັດວຽກງານຂະບວນການແຂ່ງຂັນ-ຍ້ອງຍໍ ພາຍໃຕ້ຄຳຂວັນ “ຮັກຊາດ ແລະ ພັດທະນາ” ປະຈຳປີ 2022 ແລະ ສືບຕໍ່ເປີດຂະບວນການແຂ່ງຂັນ-ຍ້ອງຍໍ “ຮັກຊາດ ແລະ ພັດທະນາ” ປະຈຳປີ 2023 ແລະ ມອບຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2022.

ໂດຍການເປັນປະທານຂອງ ທ່ານ ສົມພົງ ວັນໄພທອງ ກຳມະການປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງຄຳມ່ວນ, ມີບັນດາທ່ານຕາງໜ້າຈາກຄະນະໜ່ວຍພັກອົງການອ້ອມຂ້າງແຂວງ ທີ່ກ່ຽວຂ້ອງ ແລະ ຫົວໜ້າຂະແໜງ, ຮອງຫົວໜ້າຂະແໜງ ຕະຫຼອດເຖີງພະນັກງານພາຍໃນຄະນະໂຄສະນາອົບຮົມແຂວງເຂົ້າຮ່ວມທັງໝົດ 30 ທ່ານ, ຍິງ 16 ທ່ານ.

     ພິທີໄດ້ຜ່ານຂໍ້ຕົກລົງຂອງທ່ານເຈົ້າແຂວງຄໍາມ່ວນ ວ່າດ້ວຍການແຕ່ງຕັ້ງຄະນະຊີ້ນຳວຽກງານແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ, ຮັບຟັງບົດສະຫຼຸບການຈັດຕັ້ງປະຕິບັດຂະບວນການແຂ່ງຂັນ-ຍ້ອງຍໍ ພາຍໃຕ້ຄຳຂວັນ “ຮັກຊາດ ແລະ ພັດທະນາ” ປະຈຳປີ 2022 ທິດທາງແຜນການປີ 2023 ແລະ ບົດລາຍງານຫຍໍ້ຜົນງານ 5 ປີ ເຊີ່ງໄດ້ຍົກໃຫ້ເຫັນຜົນງານດ້ານດີ, ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ໃນການປະຕິບັດວຽກງານຕົວຈິງໃນໄລຍະຜ່ານມາ, ໃນໂອກາດດັ່ງກ່າວກໍຜ່ານດຳລັດຂອງປະທານປະເທດ ວ່າດ້ວຍການປະດັບຫຼຽນໄຊແຮງງານ ແລະ ດຳລັດຂອງນາຍົກລັດຖະມົນຕີວ່າດ້ວຍການປະດັບຫຼຽນກາແຮງງານ ແລະ ມອບໃບຍ້ອງຍໍລັດຖະບານ ເຊິ່ງຄະນະໂຄສະນາອົບຮົມແຂວງຄຳມ່ວນ ກໍໄດ້ຮັບຫຼຽນໄຊແຮງງານຊັ້ນ II, ບຸກຄົນທີ່ໄດ້ຮັບຫຼຽນໄຊແຮງງານຊັ້ນ III ມີຈຳນວນ 2 ທ່ານ, ຫຼຽນກາແຮງງານ ຈຳນວນ 1 ທ່ານ, ໃບຍ້ອງຍໍລັດຖະບານ ມີຈຳນວນ 6 ທ່ານ, ໃບຍ້ອງຍໍຂອງເຈົ້າແຂວງຜົນງານ 5 ປີ ມີຈຳນວນ 12 ທ່ານ ແລະ ຜົນງານປະຈຳປີ 2022 ມີຈຳນວນ 28 ທ່ານ. ແລະ ໄດ້ຜ່ານແຜນການເປີດຂະບວນການແຂ່ງຂັນ-ຍ້ອງຍໍ “ຮັກຊາດ ແລະ ພັດທະນາ” ຂອງຄະນະໂຄສະນາອົບຮົມແຂວງ ປີ 2023 ພ້ອມດຽວກັນນັ້ນບັນດາ 4 ຂະແໜງການກໍໄດ້ພ້ອມກັນຂຶ້ນຈັບມືເປີດຂະບວນການແຂ່ງຂັນຍ້ອງຍໍ ຮັກຊາດ ແລະ ພັດທະນາ ປະຈຳປີ 2023.

     ໂອກາດດຽວກັນນັ້ນກໍໄດ້ສືບຕໍ່ພິທີມອບຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2022 ໂດຍການຜ່ານບົດສະຫຼຸບໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2022 ແລະ ຜ່ານມະຕິຕົກລົງມອບຮັບວ່າດ້ວຍການມອບຮັບເອົາໜ່ວຍພັກຄະນະໂຄສະນາອົບຮົມແຂວງຄຳມ່ວນ ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2022 ມອບໂດຍ ທ່ານສົມພົງ ວັນໄພທອງ ກຳມະການປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ ແລະ ໄດ້ມີຄຳເຫັນໂອ້ລົມຮຽກຮ້ອງໃຫ້ບັນດາຂະແໜງການ ນຳເອົາເນື້ອໃນຈິດໃຈຂໍ້ແຂ່ງຂັນ ຮັກຊາດ ແລະ ພັດທະນາ ຂອງຄະນະໂຄສະນາອົບຮົມແຂວງວາງອອກໄປຈັດຕັ້ງຜັນຂະຫຍາຍຕາມທິດທາງແຜນການຂອງຂະແໜງຕົນຕາມພາລະບົດບາດ, ສິດ ແລະ ໜ້າທີ່ ປຸກລະດົມຊຸກຍູ້ພະນັກງານ-ລັດຖະກອນ ທີ່ຢູ່ໃນຄວາມຮັບຜິດຊອບຂອງຕົນ ໃຫ້ມີຄວາມກະຕືລືລົ້ນ, ຫ້າວຫັນປະກອບສ່ວນ ເພື່ອປະຕິບັດແຜນການດັ່ງກ່າວໃຫ້ມີຜົນສຳເລັດເປັນຢ່າງດີ.

• < ຕໍ່ໄປ
• ຕໍ່ໄປ >