ກອງປະຊຸມເຊື່ອມຊຶມ, ຜັນຂະຫຍາຍມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ່ 7 ສະໄໝທີ່ X.

ກອງປະຊຸມເຊື່ອມຊຶມ, ຜັນຂະຫຍາຍມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ່ 7 ສະໄໝທີ່ X.

ໃນວັນທີ່ 21 ກຸມພາ 2019 ແຂວງຄຳມ່ວນຈັດກອງປະຊຸມເຊື່ອມຊຶມ, ຜັນຂະຫຍາຍມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ່ 7 ສະໄໝທີ່ X ທີ່ສະໂມສອນໃຫຍ່ 21 ມີນາ ແຂວງຄໍຳມ່ວນ. ພາຍໃຕ້ການເປັນປະທານຂອງ ທ່ານ ສຸກສະຫວາດ ລັດຖະຈັກ ຄະນະປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ,

ມີບັນດາຫົວໜ້າພະແນກ, ຮອງພະແນກ, ຕະຫຼອດຮອດພະນັກງານຫຼັກແຫຼ່ງ, ທະຫານ, ຕຳຫຼວດ ເຂົ້າຮ່ວມທັງໝົດ 449 ຄົນ, ຍິງ 154 ຄົນ.

ເອກະສານກອງປະຊຸມຄົບຄະນະຄັ້ງທີ່ 7 ສະໄໝທີ່ X ທີ່ໄດ້ນຳມາເຊື່ອມຊຶມໃນຄັ້ງນີ້ປະກອບມີບັນດາມະຕິດັ່ງນີ້:

1. ມະຕິ ກອງປະຊຸມຄົບຄະນະຄັ້ງທີ່ 7 ຂອງຄະນະບໍລິຫານງານສູນກາງພັກ ສະໄໝທີ່ X.

2. ມະຕິ ຂອງຄະນະບໍລິຫານງານສູນກາງພັກ ເລກທີ່ 057/ຄບສພ ລົງວັນທີ່ 19 ທັນວາ2018 ວ່າດ້ວຍການເພີ້ມທະວີການນຳພາແກ້ໄຂຄວາມຫຍຸ້ງຍາກດ້ານເສດຖະກິດ-ການເງີນ ແລະ ສ້າງຄວາມເຂັ້ມແຂງ ຂອງການຄຸ້ມຄອງມະຫາພາກ.

3. ມະຕິ ຂອງຄະນະບໍລິຫານງານສູນກາງພັກ ສະໄໝທີ່ X ເລກທີ່ 056/ ຄບສພ ລົງວັນທີ່ 19 ທັນວາ 2018 ວ່າດ້ວຍການປັບປຸງຮາກຖານການເມືອງ ຂອງລະບອບປະຊາທິປະໄຕ ປະຊາຊົນ ໃຫ້ເຂັ້ມແຂງ ແລະ ໜັກແໜ້ນ.

ຈຸດປະສົງຂອງກອງປະຊຸມໃນຄັ້ງນີ້ກໍ່ເພື່ອເຮັດໃຫ້ພະນັກງານນຳພາ-ຄຸ້ມຄອງທຸກຂັ້ນ, ສະມາຊິກພັກ, ລັດຖະກອນ, ທະຫານຕຳຫຼວດ, ຕະຫຼອດຮອດພໍ່ແມ່ປະຊາຊົນບັນດາເຜົ່າ ໄດ້ຮັບຮູ້, ເຂົ້າໃຈແຈ້ງ ກ່ຽວກັບສະພາບຄວາມຫຍຸ້ງຍາກທາງດ້ານເສດຖະກິດ-ການເງີນ ພາຍໃນປະເທດເຮົາທີ່ຜ່ານມາ, ຄົ້ນຄ້ວາກຳນົດບັນດາມາດຕະການໃຫ້ແທດກັບຕົວຈິງ ແລະ ມີປະສິດທິຜົນສູງເພື່ອຍົກສູງຄວາມຮັບຮູ້ຄວາມເຂົ້າໃຈກ່ຽວກັບແນວທາງ, ນະໂຍບາຍ ມີຄວາມເຊື່ອໝັ້ນຕໍ່ການນຳພາຂອງພັກ ນຳເອົາເນື້ອໃນຈິດໃຈຂອງມະຕິກອງປະຊຸມດັ່ງກ່າວໄປຈັດຕັ້ງຜັນຂະຫຍາຍ ແລະ ໝູນໃຊ້ເຂົ້າໃນໜ້າທີ່ວຽກງານວິຊາສະເພາະຂອງຕົນໃຫ້ໄດ້ຮັບຜົນສຳເລັດ.