ໃນວັນທີ 26 ທັນວາ 2024 ທີ່ຜ່ານມາ ຢູ່ທີ່ຫ້ອງປະຊຸມຄະນະໂຄສະນາອົບຮົມແຂວງ ໄດ້ເປີດກອງປະຊຸມປະເມີນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ປະຈຳປີ 2024 ໂດຍການເປັນປະທານຂອງ ສະຫາຍ ບຸນເລິງ ເລີດບຸນຊູ ຮອງເລຂາໜ່ວຍພັກ ຮາກຖານຄະນະໂຄສະນາອົບຮົມແຂວງ, ມີຄະນະຮັບຜິດຊອບການປະເມີນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ຂັ້ນແຂວງ, ພ້ອມດ້ວຍຄະນະພັກຮາກຖານ ຕະຫຼອດເຖິງສະມາຊິກພັກສົມບູນ ແລະ ສຳຮອງເຂົ້າຮ່ວມ.
ໃນກອງປະຊຸມ ຄະນະຮັບຜິດຊອບການປະເມີນໜ່ວຍພັກ ປອດໃສ, ເຂັ້ມແຂງ, ໜັກແໜ້ນຂັ້ນແຂວງ ສະຫາຍ ບຸນເລິງ ເລີດບຸນຊູ ຮອງເລຂາໜ່ວຍພັກ ໄດ້ຜ່ານເອກະສານຄຸນທາດການເມືອງ ແລະຄຸນສົມບັດສິນທຳປະຕິວັດ, ຄຳສັ່ງເລກທີ 01/ກມສພ, ລົງວັນທີ 3 ມັງກອນ 2018 ວ່າດ້ວຍການເພີ້ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ຄຳແນະນຳຂອງຄະນະປະຈຳພັກແຂວງ ສະບັບເລກທີ 07/ ຄປຈ.ຄມ, ລົງວັນທີ 21 ມີຖຸນາ 2021 ກ່ຽວກັບການເພີ່ມທະວີວຽກງານກໍ່ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ, ຜ່ານເອກະສານ 7 ໜ້າທີ່ ແລະ 11 ຂໍ້ຫ້າມຂອງສະມາຊິກພັກ ໂດຍສະຫາຍ ພິມພອນ ສຸລິວົງສາ ຮອງປະທານກວດກາພັກແຂວງ ຈາກນັ້ນສະມາຊິກພັກກໍໄດ້ຜ່ານໃບສໍາຫຼວດ, ຕີລາຄາການຊີ້ນໍາ-ນຳພາຂອງຄະນະພັກ, ສະມາຊິກພັກ, ພ້ອມທັງປະກອບຄຳເຫັນ, ຕີລາຄາຄຸນນະພາບ, ແບ່ງປະເພດຕົນເອງ ແລະ ສະມາຊິກພັກພາຍໃນໜ່ວຍ ຕາມ 5 ມາດຖານ ຂອງການປະເມີນຕໍ່ການປະຕິບັດໜ້າທີ່ການເມືອງຄື: ດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ດ້ານສະພາບແນວຄິດ, ດ້ານສະຕິຕໍ່ການຈັດຕັ້ງ ແລະ ລະບຽບວິໄນ ພາຍໃນພັກ, ດ້ານແບບແຜນການນຳພາ ແລະ ວິທີເຮັດວຽກ, ດ້ານຄວາມຮັບຜິດຊອບຕໍ່ໜ້າທີ່ການເມືອງ ແລະ ໄປພ້ອມກັບການສຳຫຼວດ, ຕີລາຄາຈັດປະເພດຂອງສະມາຊິກພັກ, ຄະນະພັກ ແລະ ໜ່ວຍພັກ ຫຼັງຈາກນັ້ນ ຄະນະໜ່ວຍພັກ ກໍຜ່ານຮ່າງບົດສະຫຼຸບຂອງໜ່ວຍພັກ ປະຈຳປີ 2024 ແລະ ທິດທາງແຜນການຄາດໝາຍສູ່ຊົນປີ 2025 ໂດຍ ສະຫາຍ ອຸດອນ ສຸດທິລາດ ກຳມະການໜ່ວຍພັກ ຄະນະໂຄສະນາອົບຮົມແຂວງ. ສະຫາຍໄດ້ຍົກໃຫ້ເຫັນ ດ້ານດີ, ດ້ານອ່ອນ ແລະ ຜົນງານທີ່ຍາດມາໄດ້ເປັນຕົ້ນ: ໃນໄລຍະໜຶ່ງປີຜ່ານມາ ໄດ້ນຳພາສະມາຊິກພັກເຂົ້າຮ່ວມຮ່ຳຮຽນເຊື່ອມຊຶມ ແນວທາງ, ແຜນນະໂຍບາຍ, ມະຕິ, ຄຳສັ່ງ, ກົດລະບຽບຂອງພັກ, ກົດໝາຍຂອງລັດໄດ້ 13 ຄັ້ງ, ມີຜູ້ເຂົ້າຮ່ວມ 260 ສະຫາຍ, ຍິງ 195 ສະຫາຍ, ຈັດຕັ້ງເຊື່ອມຊືມ ແລະ ຜັນຂະຫຍາຍມະຕິຕ່າງໆໄດ້ທັງໝົດ 19 ຊຸດ ມີຜູ້ເຂົ້າຮ່ວມ 3.867 ສະຫາຍ, ຍິງ 1.134 ສະຫາຍ, ໄດ້ຈັດຕັ້ງໂຄສະນາປາຖະກະຖາ ວັນສຳຄັນຕ່າງໆ ຂອງຊາດ, ຂອງພັກ. ໄດ້ທັງໝົດ 124 ຄັ້ງ ມີຜູ້ເຂົ້າຮ່ວມ 118,375 ສະຫາຍ, ຍິງ 52,746 ສະຫາຍ, ເກັບກໍາຂ່າວ-ຂຽນຂ່າວລົງເພສບຸກ ແລະ ເວັບໄຊສຂອງ ຄະນະໂຄສະນາອົບຮົມແຂວງ ໄດ້ 52 ຂ່າວ ແລະ ຜົນງານອື່ນໆທີ່ພົ້ນເດັ່ນໃນໄລຍະຜ່ານມາ.
ໃນຕອນທ້າຍ ສະຫາຍ ອຸດອນ ສຸດທິລາດ ຍັງມີຄຳເຫັນຊີ້ນຳສະມາຊິກພັກທຸກສະຫາຍໃຫ້ເອົາໃຈໃສ່ໃນວຽກງານຊີວິດການເມືອງ, ແກ້ໄຂຈຸດອ່ອນຂອງຕົນເອງ ແລະ ໝູ່ຄະນະ ສ່ອງແສງເພື່ອສົ່ງເສີມ ແລະ ແກ້ໄຂໃຫ້ມີບາດກ້າວໃໝ່ດີກວ່າເກົ່າ, ເອົາໃຈໃສ່ຈັດຕັ້ງປະຕິບັດວຽກງານຄາດໝາຍສູ້ຊົນທີ່ວາງໄວ້ດ້ວຍຄວາມຮັບຜິດຊອບສູງ ແລະ ຜັນຂະຫຍາຍມະຕິຕ່າງໆທີ່ໄດ້ຮັບມອບໝາຍໃຫ້ ສຳເລັດ ເພື່ອຮັກສາໄດ້ໜ່ວຍພັກປອດໃສ, ເຂັ້ມແຂງ, ໜັກແໜ້ນໃນປີຕໍ່ໜ້າ .
