ຕອນແລງວັນທີ 11 ຕຸລາ 2024 ສະຫະພັນແມ່ຍິງຮາກຖານ ຄະນະໂຄສະນາອົບຮົມແຂວງ ຈັດພິທີປະເມີນການຈັດຕັ້ງປະຕິບັດຂໍ້ແຂ່ງຂັນ 3 ດີໄລຍະ II ສົກປີ (2023-2024) ແລະ ຈັບມືແຂ່ງຂັນສົກປີ 2023-2024 ທີ່ຫ້ອງປະຊຸມຂອງຄະນະໂຄສະນາອົບຮົມແຂວງ ໂດຍການເປັນປະທານຂອງທ່ານ ນາງ ລັດດາວອນ ກ້ອນແກ້ວມະນີ ປະທານສະຫະພັນແມ່ຍິງຮາກຖານ, ໃຫ້ກຽດເປັນປະທານຮ່ວມໂດຍທ່ານ ບຸນເລິງ ເລີດບຸນຊູ ຮອງຫົວໜ້າຄະນະໂຄສະນາອົບຮົມແຂວງ, ຜູ້ຊີ້ນຳອົງການຈັດຕັ້ງມະຫາຊົນ, ທ່ານ ນາງ ໄພວັນ ພົນຫາລາດ ຮອງປະທານຄະນະບໍລິຫານງານສະຫະພັນແມ່ຍິງແຂວງ, ມີບັນດາສະມາຊິກແມ່ຍິງທັງໝົດເຂົ້າຮ່ວມ.
ໃນວາລະດັ່ງກ່າວກໍໄດ້ຜ່ານມະຕິຕົກລົງຄະນະຮັບຜິດຊອບຂໍ້ແຂ່ງຂັນ 3 ດີ ໄລຍະ II (2023-2024 )ຜ່ານບົດສະຫລຸບປະເມີນຜົນການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງສະຫະພັນແມ່ຍິງລາວ, ຈາກນັ້ນຕາງໜ້າໃຫ້ຂະແໜງການຈັບມືຮັບຮອງເອົາແຜນການ ຂໍ້ແຂ່ງຂັນ 3 ດີ, ໃນຕອນທ້າຍກອງປະຊຸມ ທ່ານ ນາງ ໄພວັນ ພົນຫາລາດ ຮອງປະທານຄະນະບໍລິຫານງານສະຫະພັນແມ່ຍິງແຂວງ ກໍໄດ້ມີຄຳເຫັນໂອ້ລົມ ແລະ ຮຽກຮ້ອງໃຫ້ສະມາຊິກແມ່ຍິງທຸກທ່ານຈົ່ງເອົາໃຈໃສ່ຮັກສາມູນເຊື້ອ ຮີດຄອງປະເພນີ, ປະຕິບັດໜ້າທີ່ວຽກງານ, ຄຸນທາດການເມືອງ, ຄຸນສົມບັດສິນທຳປະຕິວັດ, ສ້າງຄວາມສາມັກຄີ ຊ່ວຍເຫຼືອເຊິ່ງກັນ ແລະ ກັນ ເຮັດໄດ້ຕາມມາດຖານຂອງແມ່ຍິງ 3 ດີ ກໍຄືພົນລະເມືອງດີ, ພັດທະນາດີ ແລະ ສ້າງຄອບຄົວດີ ເພື່ອພັດທະນາຕົນເອງໃຫ້ກາຍເປັນບຸກຄົນດີເດັ່ນ.
