ໃນໄລຍະເດືອນກັນຍາ ແລະ ຕຸລາ 2024 ຄະນະໂຄສະນາອົບຮົມແຂວງ ໄດ້ສຳເລັດການລົງເຄື່ອນໄຫວຕິດຕາມ, ເກັບກຳສະພາບແນວຄິດ-ຫາງສຽງສັງຄົມ ແລະ ຊຸກຍູ້ວຽກງານວິຊາສະເພາະ ວຽກງານສັງລວມ ແລະ ຂໍ້ມູນຂ່າວສານ ໃຫ້ຄະນະໂຄສະນາອົບຮົມເມືອງ 10 ເມືອງທົ່ວແຂວງຄຳມ່ວນ ນຳໂດຍທ່ານ ບຸນເລິງ ເລີດບຸນຊູ ຮອງເລຂາໜ່ວຍພັກຮາກຖານ, ຮອງຫົວໜ້າຄະນະໂຄສະນາອົບຮົມແຂວງ, ພ້ອມດ້ວຍຄະນະຮັບຜິດຊອບ, ມີບັນດາການນຳຂັ້ນເມືອງ, ຫ້ອງການຖະແຫຼ່ງຂ່າວ ແລະ ວັດທະນາທຳ, ຄະນະໂຄສະນາອົບຮົມເມືອງເຂົ້າຮ່ວມ.
ກອງປະຊຸມໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານການເຄື່ອນໄຫວ, ສະພາບແນວຄິດ-ຫາງສຽງສັງຄົມທີ່ພົ້ນເດັ່ນ ໃນໄລຍະຜ່ານມາຂອງບັນດາເມືອງ ໂດຍໄດ້ມີການແຕ່ງຕັ້ງຄະນະກຳມະການຮັບຜິດຊອບ ໃນແຕ່ລະຮາກຖານບ້ານ ແລະ ບັນດາຫ້ອງການອ້ອມຂ້າງໃນທົ່ວເມືອງ ເພື່ອຮັບປະກັນໃນການເປັນເສນາທິການວຽກງານວິຊາສະເພາະທາງດ້ານຕິດຕາມ, ເກັບກຳສະພາບແນວຄິດຫາງສຽງສັງຄົມເພື່ອລາຍງານໃຫ້ຄະນະພັກຂັ້ນເທິງຮັບຊາບ ແລະ ຊອກຫາວິທີແກ້ໄຂໃຫ້ທັນກັບສະພາບການ, ພ້ອມທັງຊຸກຍູ້ວຽກງານວິຊາສະເພາະ ວຽກງານສັງລວມ ແລະ ຂໍ້ມູນຂ່າວສານ, ການຕິດຕາມສື່ສັງຄົມອອນລາຍ, ຕິດຕາມການເກັບກຳຂໍ້ມູນການເຄື່ອນໄຫວວຽກງານການເມືອງ-ແນວຄິດ ເພື່ອເສີມຂະຫຍາຍວຽກງານຂ່າວສານໃຫ້ກວ້າງຂວາງ ແລະ ເຮັດໃຫ້ວຽກງານການເມືອງ-ແນວຄິດ ສາມາດຮັບຮູ້ໄດ້ທາງສັງຄົມໃຫ້ຫຼາຍຂື້ນ, ກໍຄືການສ້າງເພຈເພສບຸກ ແລະ ແນະນຳວິທີການນຳໃຊ້ ໃຫ້ບັນດາເມືອງໃນທົ່ວແຂວງເພື່ອເປັນເຄື່ອງມືໃນການໂຄສະນາທີ່ສະດວກ ແລະ ວ່ອງໄວທັນກັບສະພາບການທັງສາມາດຕອບສະໜອງໄດ້ກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່.
