ໃນໄລຍະເດືອນກັນຍາ ແລະ ຕຸລາ 2024 ທີ່ຜ່ານມາຄະນະໂຄສະນາອົບຮົມແຂວງ ໄດ້ສຳເລັດການລົງເຄື່ອນໄຫວຕິດຕາມ, ຊຸກຍູ້ວຽກງານວິຊາສະເພາະ ວຽກງານສັງລວມ ແລະ ຂໍ້ມູນຂ່າວສານ ໃຫ້ຄະນະໂຄສະນາອົບຮົມເມືອງ 10 ເມືອງທົ່ວແຂວງຄຳມ່ວນ ນຳໂດຍທ່ານ ບຸນເລິງ ເລີດບຸນຊູ ຮອງຫົວໜ້າຄະນະໂຄສະນາອົບຮົມແຂວງ, ພ້ອມດ້ວຍຄະນະຮັບຜິດຊອບວຽກງານຂໍ້ມູນຂ່າວສານ,
ການເຄື່ອນໄຫວ ຊຸກຍູ້ວຽກງານວິຊາສະເພາະ ວຽກງານຂໍ້ມູນຂ່າວສານ, ໃນຄັ້ງນີ້ກໍເພື່ອຂະຫຍາຍຕາໜ່າງຜູ້ຂຽນຂ່າວຂັ້ນເມືອງ ກໍຄືການສ້າງເພຈເພສບຸກ ແລະ ແນະນຳວິທີການນຳໃຊ້ ໃຫ້ບັນດາເມືອງໃນທົ່ວແຂວງ ພ້ອມທັງຕິດຕາມສື່ສັງຄົມອອນລາຍ, ຕິດຕາມການເກັບກຳຂໍ້ມູນການເຄື່ອນໄຫວວຽກງານການເມືອງ-ແນວຄິດ ເພື່ອເສີມຂະຫຍາຍວຽກງານຂ່າວສານໃຫ້ກວ້າງຂວາງ ແລະ ເຮັດໃຫ້ວຽກງານການເມືອງ-ແນວຄິດ ສາມາດຮັບຮູ້ໄດ້ທາງສັງຄົມໃຫ້ຫຼາຍຂື້ນ, ທັງເປັນເຄື່ອງມືໃນການໂຄສະນາທີ່ສະດວກ ແລະ ວ່ອງໄວທັນກັບສະພາບການທັງສາມາດຕອບສະໜອງໄດ້ກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່.
