ຜົນສຳເລັດຊຸດຝຶກອົບຮົມັວຽກງານໂຄສະນາອົບຮົມບັນດາແຂວງພາກກາງ ໄດ້ປິດລົງໃນຕອນເຊົ້າຂອງວັນທີ 1 ທັນວາ 2023 ໂດຍການເປັນປະທານຮ່ວມຂອງ ທ່ານ ວັນໄຊ ພອງສະຫວັນ ເລຂາພັກແຂວງ ເຈົ້າແຂວງຄຳມ່ວນ, ທ່ານ ນາງ ວິລະວອນ ພັນທະວົງ ຄະນະປະຈຳພັກ ຮອງຫົວໜ້າຄະນະໂຄສະນາອົບຮົມສູນກາງພັກ, ເຂົ້າຮ່ວມຂອງທ່ານ ສົມພົງ ວັນໄພທອງ ກຳມະການປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງ, ພ້ອມຄະນະ, ມີບັນດາຫົວໜ້າ, ຮອງຫົວໜ້າ ພະແນກການອ້ອມຂ້າງແຂວງ ແລະນັກຝຶກອົບຮົມທັງໝົດເຂົ້າຮ່ວມ.
ພິທີດັ່ງກ່າວໄດ້ຜ່ານບົດສະຫຼຸບລາຍງານຊຸດຝຶກອົບຮົມ ແຕ່ວັນທີ 27/11-1/12/2023 ເຊິ່ງມີຜູ້ເຂົ້າຝຶກອົບຮົມທັງໝົດ 61 ທ່ານ, ຍິງ 32 ທ່ານ, ເນື້ອໃນຮັບໃຊ້ຊຸດຝຶກອົບຮົມປະກອບດ້ວຍເອກະສານ 9 ບົດ, ໃນການຝຶກອົບຮົມກໍໄດ້ມີການເຮັດທົດລອງປາຖະກະຖາ ແລະທົດລອງຈັດຕັ້ງພິທີ ເພື່ອໃຫ້ນັກຝຶກອົບຮົມໄດ້ຮັບຮູ້-ເຂົ້າໃຈ ແລະນຳໄປປະຕິບັດໃນວຽກງານຂອງຕົນ. ເພື່ອເປັນການຢັ້ງຢືນໃຫ້ແກ່ນັກຝຶກອົບຮົມ ຄະນະໂຄສະນາອົບຮົມສູນກາງພັກໄດ້ມອບໃບຢັ້ງຢືນໃຫ້ນັກຝຶກອົບຮົມ ມອບໂດຍ ທ່ານ ນາງ ວິລະວອນ ພັນທະວົງ ຄະນະປະຈຳພັກ, ຮອງຫົວໜ້າຄະນະໂຄສະນາອົບຮົມສູນກາງພັກ. ໂອກາດດຽວກັນນັ້ນ ທ່ານ ວັນໄຊ ພອງສະຫວັນ ເລຂາພັກແຂວງ, ເຈົ້້າແຂວງຄຳມ່ວນ ກໍໄດ້ມີຄຳເຫັນຕໍ່ກັບຊຸດຝຶກອົບຮົມ ໃຫ້ນຳເອົາບົດຮຽນຕ່າງໆທີ່ໄດ້ເຫັນ, ໄດ້ຮັບຮູ້, ໄດ້ສົນທະນາ ແລະແລກປ່ຽນບົດຮຽນເຊິ່ງກັນ ແລະກັນ ໂດຍສະເພາະການສ້າງບົດປາຖະກະຖາ, ຂຶ້ນທົດລອງໃນການຈັດຕັ້ງພິທີ, ເປັນຜູ້ບັນຍາຍເອກະສານ ແລະບົດຮຽນຕ່າງໆທີ່ໄດ້ຈາກການຝຶກອົບຮົມ ສືບຕໍ່ໄປຝຶກຜົນຫຼໍ່ຫຼອມຕົນເອງ ເພື່ອໃຫ້ກາຍເປັນນັກເວົ້າ, ນັກຂີດຂຽນທີ່ດີ ແລະເກັ່ງ ປະກອບສ່ວນເຮັດໜ້າທີ່ການເມືອງຂອງຕົນ ເພື່ອໃຫ້ການເປັນນັກໂຄສະນາອົບຮົມທີ່ມີຄຸນນະພາບສຶບຕໍ່ໃນຮຸ່ນຕໍ່ໆໄປ.