ໃນຕອນເຊົ້າວັນທີ 5 ມັງກອນ 2024 ນີ້ ຢູ່ທີ່ຫ້ອງປະຊຸມຫ້ອງການຄະນະໂຄສະນາອົບຮົມແຂວງຄຳມ່ວນ ໄດ້ຈັດພິທີປະກາດຮັບຮອງເປັນໜ່ວຍຊາວໜຸ່ມ ແລະ ສະມາຊິກຊາວໜຸ່ມ 4 ບຸກ ຂຶ້ນຢ່າງເປັນທາງການ ໂດຍການເປັນປະທານຂອງ ສະຫາຍ ສົມໄຊ ສີຫາວົງ ເລຂາໜ່ວຍຊາວໜຸ່ມ; ເປັນກຽດເຂົ້າຮ່ວມໂດຍ ສະຫາຍ ນາງ ຈຳປາທອງ ອິນທະວົງສາ ຮອງເລຂາຄະນະບໍລິຫານງານຊາວໜຸ່ມແຂວງ; ສະຫາຍ ບຸນເລີງ ເລີດບຸນຊູ ຮອງຫົວໜ້າຄະນະໂຄສະນາອົບຮົມແຂວງ(ຜູ້ຊີ້ນໍາວຽກງານອົກການຈັດຕັ້ງມະຫາຊົນ), ມີຄະນະກອງເລຂາ 4 ບຸກຂັ້ນແຂວງ, ພ້ອມດ້ວຍສະມາຊິກຊາວໜຸ່ມ ເຂົ້າຮ່ວມ.
ພິທີດັ່ງກ່າວ ສະຫາຍ ສົມໄຊ ສີຫາວົງ ເລຂາໜ່ວຍຊາວໜຸ່ມ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດ ເນື້ອໃນຂໍ້ແຂ່ງຂັນ 4 ບຸກ ໃນໄລຍະຜ່ານມາ ເຊິ່ງຄະນະໜ່ວຍໄດ້ຖືເອົາວຽກງານສຶກສາອົບຮົມການເມືອງ-ແນວຄິດ ເປັນຫຼັກ ໂດຍການນຳເອົາບັນດາເອກະສານສຳຄັນຕ່າງໆ ຂອງຊາດ-ຂອງພັກ ຂອງຊາວໜຸ່ມ ມາເຊື່ອມຊືມຜັນຂະຫຍາຍເພື່ອເຮັດໃຫ້ສະມາຊິກ ໄດ້ຮັບຮູ້ ແລະ ເຂົ້າໃຈຢ່າງເລີກເຊິ່ງ, ໂດຍສະເພາະ ການຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກ ຂອງໜ່ວຍຊາວໜຸ່ມ ໃນແຕ່ລະດ້ານ ສາມາດຈັດຕັ້ງປະຕິບັດໄດ້ ຄື: ບຸກດ້ານການເມືອງ – ແນວຄິດ ປະຕິບັດໄດ້ 90,58%, ບຸກດ້ານການຝຶກຝົນຫຼໍ່ຫຼອມຮໍ່າຮຽນ ປະຕິບັດໄດ້ 90,58%, ບຸກດ້ານການຈັດຕັ້ງ ປະຕິບັດໄດ້ 90,58%, ບຸກດ້ານວິຊາຊີບ-ສ້າງວຽກເຮັດງານທຳ ປະຕິບັດໄດ້ 90,29%, ສະເລ່ຍທັງ 4 ດ້ານ ປະຕິບັດໄດ້ 90,50%.
ເພື່ອເປັນການຢັ້ງຢືນເຖິງຜົນງານການເຄື່ອນໄຫວຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກ ດັ່ງກ່າວ ຄະນະບໍລິຫານງານຊາວໜຸ່ມແຂວງ ຈິ່ງໄດ້ມອບປ້າຍ ແລະ ໃບຢັ້ງຢືນ 4 ບຸກ ໃຫ້ແກ່ໜ່ວຍຊາວໜຸ່ມ ພ້ອມກັບສະມາຊິກ ພາຍໃນໜ່ວຍຊາວໜຸ່ມ ຈຳນວນ 17 ສະຫາຍ, ຍິງ 10 ສະຫາຍ ເຊິ່ງເປັນກຽດມອບໂດຍ ສະຫາຍ ນາງ ຈຳປາທອງ ອິນທະວົງສາ ຮອງເລຂາຄະນະບໍລິຫານງານຊາວໜຸ່ມແຂວງ, ຈາກນັ້ນ ກໍ່ໄດ້ມີການຈັບມືແຂ່ງຂັນ ເພື່ອສືບຕໍ່ປະຕິບັດເນື້ອໃນຂໍ້ແຂ່ງຂັນ 4 ບຸກ ໃນຕໍ່ໜ້າ.
ໃນຕອນທ້າຍຂອງພິທີ ຍັງໄດ້ຮັບຟັງການໂອ້ລົມຂອງ ທ່ານ ນາງ ຈຳປາທອງ ອິນທະວົງສາ ຮອງເລຂາຄະນະບໍລິຫານງານຊາວໜຸ່ມແຂວງ ເຊິ່ງກ່ອນອື່ນທ່ານກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການເຄື່ອນໄຫວໃນໄລຍະຜ່ານມາ ແລະ ໄດ້ເນັ້ນໜັກບາງບັນຫາໃຫ້ຄະໜ່ວຍຊາວໜຸ່ມ ພ້ອມດ້ວຍສະມາຊິກຊາວໜຸ່ມ ວ່າ: ຄະນະໜ່ວຍຊາວໜຸ່ມ ຕ້ອງໄດ້ເອົາໃຈໃສ່ຕໍ່ວຽກງານສຶກສາອົບຮົມເມືອງ-ແນວຄິດ ກັບສະມາຊິກໃຫ້ມີຫຼາຍຮູບແບບຫຼາຍວິທີ, ຖືເອົາວຽກປັບປຸງການຈັດຕັ້ງເປັນສິ່ງສຳຄັນ ເຮັດໃຫ້ການຈັດຕັ້ງຊາວໜຸ່ມ ມີຄວາມໜັກແໜ້ນເຂັ້ມແຂງ, ກໍ່ສ້າງໃຫ້ໄດ້ສະມາຊິກຊາວໜຸ່ມຜູ້ທີຫ້າວຫັນດີເດັນເພື່ອສືບທອດພາລະກິດປະຕິວັດ ປະຕິບັດໜ້າທີ່ວຽກງານວິຊາສະເພາະ ຕາມການມອບໝາຍໃຫ້ສຳເລັດ, ຮັກສານາມມະຍົດຊາວໜຸ່ມ 4 ບຸກ ນີ້ໄວ້ຕະຫຼອດໄປ.